НАЎРУЗ ЗБІРАЕ СЯБРОЎ!
Х адкрыты гарадскі міжвузаўскі фестываль-свята Наўруз-2023 сабраў у сценах Акадэміі прадстаўнікоў з 18 краін свету – студэнтаў і слухачоў 8 устаноў вышэйшай адукацыі Рэспублікі Беларусь.
Першая частка свята была сканцэнтравана на спартыўных мерапрыемствах пры кафедры фізічнага выхавання і спорту: дартс, настольны тэніс і перацягванне ліны – студэнты з Узбекістана, Лівана, Ірана і Туніса ва ўпартай і займальнай барацьбе вызначалі пераможцаў.
Выстава творчасці і кулінарыі, прысвечаная святу вясны, стала другой часткай фестывалю і праходзіла ў сценах Дома культуры Віцебскай дзяржаўнай акадэміі ветэрынарнай медыцыны. Эксклюзіўныя стравы, нацыянальныя касцюмы, танцы народаў свету і мора смачных уражанняў – гэта варта было ўбачыць і паспрабаваць!
У канцэртнай зале Дома культуры Акадэміі прайшла кульмінацыя інтэрнацыянальнага свята: узнагароджанне ўдзельнікаў фестывалю, а таксама пераможцаў i міжвузаўскай алімпіяды па рускай мове, якая праходзіла на базе нашай Акадэміі 20 сакавіка 2023 года. Яркая і запальная канцэртная праграма падарыла незабыўныя ўражанні, зарад станоўчых эмоцый усім удзельнікам свята Вясны, асабліва студэнтам з ліку замежных грамадзян, якія нават за тысячы кіламетраў ад сваёй Радзімы змаглі акунуцца ў атмасферу чагосьці хатняга і роднага.
Факультэт міжнародных сувязяў, прафарыентацыі і давузаўскай падрыхтоўкі
