Сумныя рэчы (аб праглядзе відэафільмаў)
Звычайна, калі на лекцыях, занятках альбо куратарскіх гадзінах паказваюць фільмы (вучэбныя, мастацкія ці прысвечаныя якой-небудзь нагодзе), абсалютнай цішыні не бывае. Заўсёды знойдуцца адзін, два, тры, а можа, і больш (залежыць ад агульнай колькасці гледачоў і выхаванасці аўдыторыі) студэнтаў, якія будуць каментаваць, тлумачыць, крытыкаваць тое, што бачаць на экране. Альбо будуць проста абмяркоўваць свае бягучыя справы.
Зусім не так прайшоў прагляд фільмаў “Расплата закладчыка. Спецыяльны рэпартаж” і “Святло ў канцы тунэля” на куратарскай гадзіне ў чацвёртай групе першага курса ФВМ. Гаворкі, шэптаў і ўсяго таго, што сведчыць пра недавер, сум і жаданне хутчэй сысці, НЕ БЫЛО ЗУСІМ!!! Прычына гэтага у тым, што фільмы былі пра сумныя і страшныя рэчы. У фільмах былі паказаны залежнасці і тое, да чаго гэтыя залежнасці могуць прывесці.
Нарказалежнасць… Пря яе трэба памятаць самому, тлумачыць іншым, выкараняць не толькі ў Міжнародны дзень барацьбы з наркаманіяй і незаконным абаротам наркоцікаў (якому і была прысвечана куратарская гадзіна), але і ва ўсе астатнія дні года. Акрамя таго, што нарказалежнасць разбурае здароўе тых, хто “падсеў” на парашкі, ін’екцыі ці таблеткі, яна бурыць жыццё і тых, хто паверыў, што існуе магчымасць па-за чэснай працай зарабіць шмат грошаў. Так, уся “дробязь” (закладчыкі, перавозчыкі, трафарэтчыкі і г.д.) зарабілі. Але сабе яны зарабілі буйныя тэрміны зняволення, а камусьці – прэстыжныя машыны, маёнткі, яхты… Фільм пра закладчыкаў паказаў легкадумства і глупства маладых людзей, падлеткаў, амаль дзяцей (як і тых, што знаходзіліся на праглядзе). Пасля фільма, падчас яго абмеркавання, студэнты казалі, што лёгкія грошы не вартыя таго, каб зламаць сабе жыццё. І вельмі вялікая верагоднасць: ніхто з прысутных не стане зарабляць падобным супрацьзаконным спосабам.
Другая залежнасць, якая рушыць жыццё і асобнага чалавека, і сямей, і нават цэлых народаў – гэта залежнасць алкагольная. У чымсьці яна яшчэ больш страшная за залежнасць наркатычную. Алкаголь часцяком успрымаецца як нешта звычайнае (як частка свята, жальбы ці нават як падарунак). Студэнты ўбачылі, што алкагольныя напоі – гэта не свята, радасць і весялосць. Гэта няшчасные дзеці, гэта асацыяльны лад жыцця, гэта адміністрацыйныя і крымінальныя артыкулы, гэта гора тых, хто знаходзіцца побач з ужываючымі.
Перад праглядам фільмаў аўтар гэтай нататкі як мог цвёрда даў зразумець: любая залежнасць – ёсць зло. Пасля прагляду, падчас абмеркавання, усе прысутныя згадзіліся, што гэта так. Вельмі жадаецца верыць, што ўсё сказанае і паказанае стане жыццёвым арыенцірам для тых, хто слухаў і глядзеў. Але гэта не апошняя сустрэча. І выхаваўчая праца працягнецца! Варта дадаць, што фільмы былі прадстаўлены аддзелам выхаваўчай работы з моладдзю, за што яго супрацоўнікам асобны і вялікі дзякуй.
Дацэнт кафедры ўнутраных незаразных хвароб жывёл
Сяргей Пятроўскі
13.03.2024
